■ 吖，今日D科技股又好似有番D生氣，隻小超新話升番上十四蚊，臨尾仲幾有氣勢, 高收添
▲ 會唔會係「死貓式」反彈咋？
◆ 如果係死貓式反彈既話，呢隻貓都算有D力，唔似一日鮮果種，因為呢次反彈都幾全面，除左小超神話外，其他科技股例如公仔書，肥佬黎，東洋孖寶等等都反彈得有聲有色，接近高位收市。
■ 但係每隻科技股向上都有唔少「蟹貨」喎，點算呀。
◆ 咁都係一個問題，不過你睇番唔少科技股都已經跌番去差唔多開車前既水位，香港科技股既調整其實論深度嚟講，已經比「勒斯特」嘅勁得多，只要有大D既資金流入，應該可以有D似樣D既反彈嘅。
■ 但係流入既錢有幾大先？
◆ 最行貨既答案咪緊係視乎海外「孖劇」既表現囉，不過咁樣即係講等於冇講囉，如果實中嘅話，我仲洗係度咩。比較建設性嘅答案係留意幾隻龍頭例如小超神話、肥佬黎、公仔書等的表現，若果聽日高開低收，就好可能係炒高再派，咁就要走為上著啦。另外，又可以睇下幾隻基金科技股，例如和黃拍拿，神州IBM等，若果佢地升唔倒，就會確定呢次反彈只是莊家發動，冇乜機構性投資者跟著，若是如此，就很難有大作為嘞！
備註： 死貓式反彈Dead cat bound （老番用之比喻為曇花一現的反彈）
小超神話：盈動（1186）
肥佬黎：壹傳媒（282）
公仔書：文化傳信（343）
東洋孖寶：軟庫（648） 光通信（603）
神州IBM：聯想（992）
和黃拍拿：科聯系統（46）